KOCHA MBEYA CITY: SIKUWA NA CHAGUO LA KUFANYA

JUMA Mwambusi aliyekuwa kocha mkuu wa Mbeya City amesema kuwa hakuwa na chaguo la kufanya ndani ya kikosi hicho zaidi ya kuachia ngazi ya kukinoa kikosi hicho ili kuokoa jahazi lisizame.

Mwambusi aliachia ngazi ndani ya klabu hiyo mwezi Novemba kutokana na timu kuwa na mwenendo mbovu jambo ambalo lilikuwa linamkosesha raha.

Akizungumza na Saleh Jembe, Mwambusi amesema kuwa anamshukuru Mungu kila kitu kinakwenda sawa ana amini Mbeya City itarejea kwenye ubora wake.

“Nimekuwa na vijana kwa muda mrefu wakati mwingine unashindwa kuelewa tatizo lipo wapi kwa kuwa vijana wanajituma wanatengeneza nafasi ila wanashindwa kufunga hivyo tatizo hilo lilinifanya nami nisiwe na chaguo la kufanya,” amesema Mwambusi.

Mwambusi aliiongoza timu ya Mbeya City kwenye jumla ya mechi 12 akiwa na point 8 zilizoifanya timu kuwa nafasi ya 19 na alipata ushindi mechi moja pekee mbele ya Mbao kwa ushindi wa mabao 2-1 sare tano na alipoteza jumla ya mechi 8.