KUNA mtego mkubwa ambao Simba imetegewa leo Alhamisi kwenye Ligi Kuu Bara ambao ikiuruka itawaacha Yanga kwa pointi 17 na ndio kitu kitakachokuwa gumzo kuanzia jioni hii kwa mashabiki kwani tayari wameshaanza mitandaoni.
Simba inacheza na Prisons iliyoko kwenye fomu ambayo haijapoteza mchezo wowote msimu huu, rekodi ambayo timu zote zimeishindwa.
Azam, Simba hata Yanga wote wameshapoteza. Simba yenye pointi 21 ikitegua mtego wa Prisons leo wa kutokufungwa itafi kisha pointi 24 huku mtani wao Yanga akibaki na pointi zake saba. Yanga ambayo ina viporo vingi kutokana na kwamba ilikuwa bize kimataifa, inacheza na Ndanda ugenini kesho Ijumaa.
Rekodi za Ligi Kuu Bara zinaonyesha kwamba Simba haijapoteza mechi tano za mwisho zilizopita dhidi ya Prisons inayomilikiwa na Jeshi la Magereza, maskani yake yakiwa Mbeya. Simba ilishinda zote tano, tatu ikicheza nyumbani jijini Dar es Salaam na mbili ugenini, jambo ambalo ni mtihani kwa usajili mpya wa Simba wenye Wabrazili watatu.
Lakini mtihani wa Prisons ni kushinda dhidi ya Simba na kufuta uteja pamoja na kuweka rekodi mpya msimu huu ambao una ushindani mkubwa.
Kocha wa Simba, Patrick Aussems amesisitiza kwamba ndio kwanza gari limewaka na amevutiwa na staili ya uchezaji wa vijana wake hasa kwenye kapeti la Uwanja wa Uhuru na Taifa.
Post a Comment