LIGI DARAJA LA KWANZA ISIFUMBIWE MACHO, MASHABIKI TUSIISHAU STARS

LIGI Kuu Tanzania Bara inazidi kuchanja mbunga huku ushindani ukionekana kuwa mkubwa kwa kila timu kupambana kupata matokeo chanya ambayo yatawafanya wafikie malengo yao ambayo wamejiwekea kwa sasa ndani ya ligi pale itakapokamilika.

Tunaona namna kila timu zinavyoonyesha ule ushindani wa kweli jambo ambalo linamaanisha kwamba kuna mambo ambayo yanafanyiwa kazi kila iitwapo leo huku ligi yetu taratibu ikizidi kukomaa licha ya kwenda mwendo wa kusuasua tunastahili kuwapongeza wale ambao wanapambana katika hili.

Kila mmoja anayependa mpira hesabu zake ni kuona kwamba timu yake inafanya vema na matokeo yanapatikana ndani ya dakika tisini uwanjani hili ni jambo la muhimu kuzingatia kwani ukweli ni kwamba matokeo yanapatikana ndani ya uwanja na sio nje ya uwanja.

Kumekuwa na baadhi ya timu zimekuwa zikipenda kujihusisha na masuala ambayo yanaonyesha dalili za ushirikina hili sio sawa kwani kwa teknolojia ilivyokuwa kwa sasa kuna mambo mengine ambayo yalikuwa yanafanywa nyuma yaachwe tu.

Tumeona kwenye Ligi Daraja la Kwanza kuna kesi kama hii ambapo Rhino Rangers inadaiwa walifanya vitendo hivi na kesi imepelekwa kwenye Shirikisho la Soka Tanzania (TFF) hii  ni kupotezeana muda tu.

Kwa timu ambayo inatambua inahitaji nini ni lazima ijipange na kufanya maandalizi mazuri jambo pekee ambalo linatoa ushindi kwa timu husika ambayo inasaka matokeo uwanjani.

Kwa wale ambao bado wapo kwenye zama zile wanapaswa washtuke na kufanya kweli kuanzia kwenye maaandalizi na kujiamini kwamba wanaweza kufanya mambo makubwa bila kuamini mambo ambayo hayapo kwenye mpira.

Pia masuala ya kuanza kuwa na hofu mapema maana yake ni kwamba tayari umeshashindwa soka kuna jambo jingine ambalo unaweza kulifanya nje ya soka kiushindani.

Ligi zote zinapaswa ziwe na ushindani ila sio kushindana kwa masuala ya madawa na ushirikina hapana haitakuwa ni ushindani wa kweli kwani kila mchezaji atakuwa haonyeshi uwezo alionao.

Ni sawa na mwanafunzi ambaye anaingia kwenye chumba cha mtihani akiingia na vile vibomu hawezi kufanya mtihani kwa kujiamini muda wote anakuwa na mashaka huenda atakamatwa jambo ambalo ni kosa kwa kweli.

Muda wa maandalizi timu zinapaswa kuutumia vema kwa kujiandaa na kuachana na masuala ya nguvu za giza ambazo zinaonekana kuwamaliza kimyakimya wale ambao hawajajiandaa kwa umakini.

Soka letu linakua na linapiga hatua endapo kutakuwa na mwendelezo wa vitendo hivi ni mwendelezo wa kufeli na kushindwa kupata vipaji vya kweli kisa ushirikina.

Pia kumekuwa na vurugu ambazo hazina msingi hasa huku kwenye Ligi Daraja la Kwanza ilitokea kwenye mchezo kati ya Pamba na Gwambina FC hili pia nalo wadau mnapaswa kulikemea na kukataa hali hii.

Ugomvi si asili ya soka kwa kufanya ugomvi tunapoteza ule uhalisia wa soka na kuja na jambo ambalo tunalitambua wenyewe huku kunapoteza muda na kumaliza nguvu za wale ambao wanapenda burudani.

Kwenye soka ni muda wa kutazama nani anafanya vizuri nani anafeli ili kutafuta suluhisho kwenye mchezo unaofuata sasa ikiwa kila sehemu kitu kidogo watu mnakunjana mashati sio sawa.

Ingekuwa vema mashabiki muda ambao mnakunjana mashati mgekuwa bize kutafuta wadhamini ambao watawekeza kwenye soka huku ambako kuna vipaji vya kweli ila mnashindwa na kukimbilia ugomvi.

 Imeonekana kuna shabiki amechomwa na kitu cha ncha kali mpaka umwagaji wa damu unafanyika kwenye soka hivi vitu tulishaanza kuvisahau kutokana na ustaarabu wa watanzania nashangaa kuona vinarudi.

Kinachotakiwa kwa sasa ni kukaa chini na kumaliza tofauti kabla ya kufikia hatua hii naona kwenye ligi daraja la kwanza kwani hali si shwari kwa sasa.

 Kuna malalamiko kuhusu waamuzi kwenda na matokeo yao uwajani katika hili basi suluhisho linatakiwa mapema kabla halijawa sugu.

Waamuzi mnapaswa mjichunguze na kazi yenu iwe moja tu kufuata sheria 17 za soka hata kama mnachezesha Ligi Daraja la Kwanza kwa kufanya hivyo zile lawama na zile kelele za mashabiki zitakwenda na maji jumla huku soka letu likizidi kuimarika.

Mashabiki pia nanyi mnapaswa kutambua kwamba mwamuzi naye ni binadamu kuna wakati anakosea kuweni na busara sio kosa la mwamuzi basi mnahamishia hasira kwa mashabiki hili haileti afya kwenye soka.

Umakini katika kila sehemu unahitajika ili kupata kile ambacho kila mmoja anakihitaji endapo kila mmoja atashindwa kuwa makini matokeo yake ni kushindwa kuelewana na kugombana bila sababu.

Pia ukiachana na hayo mashabiki tunapaswa tukumbuke kuwa michuano ya kufuzu Afcon kwa timu yetu ya Tanzania mchezo wake wa pili iliboronga kwa kufungwa mabao 2-1 na Libya mchezo uliochezwa nchini Tunisia.

Kufungwa kwao sio mwisho wa safari bado kuna mechi zinaendelea ni wakati wa kuendelea kuipa sapoti timu yetu ya Taifa kwa kuwapa moyo wachezaji.

Kwa wachezaji nao wana deni na kazi ya kufanya kwa kujiandaa vema ili kupata matokeo kwenye mechi zao zinazofuata kila kitu kinawezekana endapo watajiandaa vema.

Ni suala la muda tu kwani kwa sasa kundi J bado lipo wazi kwa kila timu bado kuna nafasi ya kupenya na kushiriki kwa mara nyingine Afcon ili kujiongezea ujuzi na uzoefu mara dufu.

Nina amini tayari kocha Etienne Ndayiragije ameona mapungufu ya wachezaji yalipo pamoja na makosa yao yanavyowamaliza jambo ambalo litaleta matokeo chanya wakati ujao.

Muda wa maandalizi upo kwani michuano hii mikubwa ina hadhi yake kwa timu ambazo zitatinga kwenye hatua hii ni jambo la kusubiri na kujaandaa kuweza kushiriki kwa mara nyingine tena.