MICHEZO FORUM

Kocha wa Simba Mbelgiji, Patrick Aussems, kupitia akaunti yake rasmi ya Instagram leo Novemba 30, 2019 amethibitisha kuwa Bodi ya Wakurugenzi ya klabu ya Simba, kupitia kwa Mtendaji mkuu wa timu hiyo, Senzo Mazingiza, imemtaarifu kwamba, kuanza sasa, yeye sio kocha mkuu wa timu ya Simba SC.

HASSAN Mwakinyo bondia wa ngumi za kulipwa Bongo amesema kuwa hajafurahishwa na aina ya ushindi alioupata mbele ya Arnel Tinampaya.

Kwenye pambano la rauundi 10 lililopigwa uwanja wa Uhuru, Mwakinyo alishinda kwa pointi jambo ambalo hajafurahia.

"Sijafurahia aina ya ushindi niliuupata ila ni sehemu ya matokeo kwa kuwa ushindani ulikuwa mkubwa na gloves hazikuwa rafiki kwangu, wakati mwingine nitakuwa tofauti zaidi ya hapa," amesema Mwakinyo.

Matokeo ya jumla yapo namna hii:-Jaji wa kwanza ametoa 97 -93 , Jaji wa pili akatoa 98-92 na Jaji wa tatu akatoa 96-96.

IMEFAHAMIKA kuwa wakati wowote Klabu ya Simba itaachana na benchi zima la ufundi huku tetesi zikimtaja kocha wa sasa wa Polisi Tanzania, Suleiman Matola anaweza kurejea ‘nyumbani’ kuwa kocha msaidizi wa timu hiyo.



Hiyo imekuja ikiwa ni saa chache kabla ya kikao cha Bodi ya Wakurugenzi ya klabu hiyo ikitarajiwa kukutana jana usiku na kocha Mbelgiji, Patrick Aussems kuzungumzia hatima yake kwenye timu hiyo iliyo chini ya Denis Kitambi hivi sasa.



Ni mara ya pili mfululizo kwa Matola kutajwa kwenye misimu miwili ya hivi karibuni, awali ilikuwa kwenye msimu uliopita kabla ya Kitambi kupewa nafasi hiyo ya kocha msaidizi.



Kwa mujibu wa taarifa ambazo imezipata Championi Ijumaa kutoka ndani ya bodi ya timu hiyo muda wowote klabu hiyo itatangaza kuachana na benchi zima la ufundi.



Mtoa taarifa alisema kuwa Matola ndiye aliyepewa nafasi kubwa ya kufundisha timu hiyo baada ya kuwapita makocha wengine wazawa ambao majina yao yalikuwepo mezani yakijadiliwa.



Aliongeza kuwa mara baada ya Matola kutangazwa, haraka atajiunga na timu hiyo kwa ajili ya kuifundisha huku viongozi wakiendelea kumtafuta kocha mkuu atakayeungana na Matola.



“Ni suala la muda hivi sasa juu ya Matola kutangazwa kuwa kocha msaidizi hiyo ni baada ya vikao vya bodi ya klabu kumpitisha kuwa kocha msaidizi, ni baada ya benchi kupanga kuvunjwa.



“Kocha Mkuu ambaye ni Aussems leo (jana) usiku alitarajiwa kukutana na viongozi wa bodi ya klabu kwa ajili ya kuzungumzia hatima yake, pia kufikia hatima nzuri kabla ya kumpatia barua ya kuachana naye.



“Hivyo, baada ya kikao hicho haraka viongozi watamtangaza Matola kuwa kocha msaidizi wa Kitambi huku mabosi wakiendelea na mchakato wa kumtafuta kocha mkuu,” alisema mtoa taarifa huyo na kuongeza:



“Viongozi juzi walikasirishwa na kitendo kibaya alichokifanya Kitambi cha kuzungumzia masuala ya timu mara baada ya mazoezi akisema kuwa yeye ndiye kocha hivi sasa baada ya Aussems kusimamishwa.



“Kauli hiyo inamaanisha kuwa siyo msiri kutokana na kutoa siri za timu, hivyo baada ya kauli hiyo haraka viongozi walimuita na kukaa naye kikao na kumpa onyo la kutorudia tabia ya kuongea hovyo kwenye Vyombo vya Habari.”

Kocha ambaye jina lake likitajwa tu mashabiki wa Yanga wanashtuka, Mwinyi Zahera ametua nchini usiku wa kuamkia jana Jumatano.

Zahera tofauti na alivyozoeleka juzi alikuwa amepiga uzi mwekundu wa timu ya Taifa ya DR Congo na baadhi ya mashabiki waliokuwa kwenye Uwanja wa Ndege wa Kimataifa wa Julius Nyerere aliwagawia.

Yanga wamekuwa hawataki kumsikia Zahera kwa madai kwamba anavujisha siri zao kwenye vyombo vya habari.

Kwa mujibu wa gazeti la Spoti Xtra linajua kwamba kocha huyo ana ofa tatu mezani kwake ingawa amegoma kuweka wazi majina ya timu mpaka atakapomalizana na Yanga wiki ijayo

Aliyekuwa kocha wa Tanzania Taifa Stars Emmanuel Amunike raia wa Nigeria ameomba kazi ya kufundisha timu ya Taifa ya Zambia 'Chipolopolo'.

Ikumbukwe Amunike alifukuzwa kazi Tanzania baada ya kuwa na mwenendo mbaya ndani ya kikosi cha Stars.

Hivi karibuni Amunike alihojiwa na kituo cha habari cha BBC na kusema kuwa anatafuta kazi sababu mpaka sasa hana kibarua chochote.

Maombi yake ya kazi kwenda Chipolopolo yameungana na makocha wengine ambao wameomba kazi ndani ya timu hiyo ambayo ni kongwe ndani ya ukanda wa Afrika katika mashindano ya kimataifa.

KATIKA kuhakikisha wanapata pointi tatu, mabosi wa Yanga watano, leo alfajiri walitarajiwa kusafiriki kwa ndege kutoka Dar es Salaam kuelekea Mwanza kwa ajili ya kuiongezea hamasa timu yao itakapokuwa uwanjani ikivaana na Alliance School ya mkoani huko.



Timu hizo zitavaana katika mchezo wa Ligi Kuu Bara unaotarajiwa kujaa upinzani mkubwa baada ya juzi Alliance kupokea kipigo cha mabao 5-0 kutoka kwa Azam FC.

Yanga kwenye mchezo huo inatarajiwa kuwakosa wachezaji wake muhimu watano kati ya hao wanne wapo kwenye majukumu ya timu ya taifa ya Zanzibar Heroes ambao ni Issa Mohamed ‘Banka’ Abdulaziz Makame, Ali Ali na Feisal Salum ‘Fei Toto’ huku Mapinduzi Balama naye akisumbuliwa na maumivu ya nyonga.



Mhamasishaji wa Yanga, Antonio Nugaz amesema lengo la viongozi kusafiri kwenda mkoani huko ni kwa ajili ya kuongeza hamasa ya wachezaji na mashabiki kujitokeza kwa wingi ili kufanikisha wanapata pointi tatu zitakazowaweka katika nafasi nzuri kwenye msimamo.



Nugaz alisema kuelekea mchezo huo utakaopigwa saa kumi kamili jioni kwenye Uwanja wa CCM Kirumba, Mwanza wadhamini wa timu hiyo ambao ni wauzaji wa jezi, GSM wametenga tena kitita cha Sh milioni 10 kama timu ikipata ushindi, ikiwa ni sehemu ya kuwaongezea morali kwa wachezaji wao.



Aliwataja viongozi waliotarajiwa kusafiri kuwa ni Mkurugenzi wa Mashindano, Thabithy Kandorro, Mwenyekiti wa Kamati ya Ufundi  Salum Rupia, Katibu Mkuu David Ruhango, Mwenyekiti wa Kamati ya Mashindano Rogers Gumbo na yeye mwenyewe. “Kila kitu kinakwenda vizuri katika kuelekea mchezo huo ambao tumepanga kuchukua pointi tatu muhimu zitakazotuwezesha kupanda juu kwenye msimamo wa ligi ambayo ndiyo malengo yetu.



“Tunataka kuona mashabiki wengi wakijitokeza uwanjani kuwasapoti vijana wetu, wakiendelea kupata sapoti hiyo, pia siku hiyo kabla ya pambano asubuhi tutakwenda kutoa misaada Hospitali ya Bugando ya palepale Mwanza kwenye wodi ya mama wajawazito na watoto kwa kutoa magodoro 200, sukari kilo 200 na mataulo 200,” alisema Nugaz.



Mkwasa abadili program Katika hatua nyingine kikosi cha timu hiyo jana asubuhi na jioni kilifanya mazoezi mara mbili tofauti na ilivyokuwa progam yao ya kawaida, katika kujiandaa na mchezo huo chini ya Kaimu Kocha Mkuu Charles Boniface Mkwasa, yaliyofanyika asubuhi Uwanja wa Butimba na jioni Uwanja wa CCM Kirumba utakaotumika kuchezea mechi.



Akizungumzia maandalizi ya mchezo huo Mkwasa alisema kuwa mechi hiyo itakuwa ngumu kutokana na wapinzani wao kutopata matokeo mazuri katika mchezo wao uliopita. “Siwezi kueleza mipango kwa undani ila tumejipanga kushinda, tunajua tutapata changamoto kwa sababu wapinzani kupata matokeo yasiyoridhisha kwenye mechi yao iliyopita, ishu ya uwanja hainipi wasiwasi naujua vizuri,” alisema Mkwasa.

Tanzania imeshuka kwa nafasi moja katika viwango vya ubora wa soka duniani vilivyotolewa na FIFA hapoNovemba 28,2019, kutoka nafasi ya 133 na sasa inashika nafasi ya 134.

Kushuka kwa Tanzania kunajiri baada ya taifa hilo kupoteza 2-1 kwa Libya katia kundi J

Kwa upande mwingine Sare 1-1 dhidi ya Misri katika michuano ya kufuzu kwa kombe la mataifa mabingwa Afrika 2021 imeisaidia Kenya kupanda nafasi mbili juu katika orodha mpya za shirika hilo la kandanda duniani iliotolewa siku ya Alhamisi.

Katika orodha hiyo nayo Burundi ikishuka nafasi nane chini hadi nafasi ya 151.

Harambee Stars ya Kenya sasa ipo katika nafasi ya 106 duniani ikiwa ni nafasi mbili juu kutoka nafasi ya 108 ambayo ilikuwa ikishikilia wakati wa orodha ya miwsho iliofanyika Oktoba 24.

Timu hiyo ingepanda juu zaidi katika orodha hiyo iwapo wangepata matokeo mazuri dhidi ya Togo nyumbani katika mechi yao ya pili ya kufuzu.

Majirani Uganda hatahivyo wamepanda juu nafasi mbili zaidi hadi nafasi 77 na inasalia timu inayoorodheshwa juu zaidi huku Kenya ikiwa ya pili.

Mabingwa mara tano wa bara la Afrika klabu ya TP Mazembe wamepanga kujenga uwanja utakaochukua mashabiki 50,000 walioketi, kuanzia mwaka ujao 2020.

Rais wa klabu hiyo yenye maskani yake makuu mjini Lubumbashi Moise Katumbi, ametangaza mpango huo leo Alkhamis, katika hafla maalum ya miaka 80, tangu kuzaliwa kwa klabu hiyo.

Miongoni mwa wageni waalikwa katika hafla hilo iliyofanyika mjini Lubumbashi, Rais wa shirikisho la soka duniani FIFA Gianni Infantino pamoja na Rais wa CAF Ahmad Ahmad, walihudhuria.

“Tumepata mkopo ambao utatuwezesha kujenga uwanja utakaochukua mashabiki 50,000, tumedhamiria kufanya ujenzi huo ili kutoa nafasi kwa mashabiki wetu kuishuhudia timu yao ikicheza uwanjani.” Alisema Katumbi.

Mwakinyo, Mfilipino wapima uzito, tofauti yaonekana
“Kwa sasa tuna uwanja unaochukua mashabiki 22,000, muda unavyozidi kusogea tumebaini mashabiki wetu hawatoshi kwenye uwanja huo, na badala yake wanaishia kuishuhudia timu yao kupitia televisheni, lengo langu ni kuona kila mmoja anafika uwanjani kuishuhudia timu yake ikicheza.”

Kwa upande wa Rais wa FIFA Infantino amekiri kuvutiwa na mipango ya klabu hiyo ya DR Congo, na amesisitiza suala la kiongozi huyo kuendelea kupewa ushirikiano wa kutoka ili kufanikisha maendeleo ya soka nchini humo.

Mwengine Yanga kuikosa Alliance Schools
Pia akathibitisha usaidizi wa uwanja huo mpya wa TP Mazembe, kutoka FIFA ili kuonyesha ni vipi walivyoguswa na juhudi za Katumbi, ambaye siku zote amekua akidhihirisha kwa vitendo.

Image result for infantino and katumbiAhmad, Infantino na Katumbi baada ya mchezo wa jana uwanja wa TP Masembe

Jana Jumatano Ahmad, Infantino na Katumbi walishiriki katika mchezo maalum wa soka, ambao uliwashirikisha magwiji wa soka kutoka barani Afrika kama Samuel Eto’o na Kalusha Bwalya kwenye uwanja wa sasa wa TP Mazembe.

Kikosi cha Yanga kesho Novemba 28, 2019 kitacheza dhidi ya Alliance ya jijini Mwanza mchezo utakaopigwa katika Uwanja wa CCM Kirumba ikiwa ni mwendelezo wa Ligi Kuu Tanzania Bara huku ikiwakosa baadhi ya wachezaji ambao ni majeruhi na waliotwa katika timu ya taifa ya Zanzibar.



Akizungumza na waandishi wa habari Afisa habari wa Klabu ya Yanga, Hassan Bumbuli amesema kuwa wachezaji wanne walioitwa katika Timu ya taifa ya Zanzibar wamewaacha akiwemo Ally Ally , Abdulaizi Makame, Feisal Salum na Mohammed Issa huku Mapinduzi Balama akiwa majeruhi aliyopata katika mchezo dhidi ya JKT Tanzania huku wachezaji wengine wakiwa wapo tayari kwaajili ya mchezo huo.



Aidha Afisa Muhasishaji wa klabu ya Yanga, Antonio Nugaz ametoa ratiba ya shughuli za kijamii ambazo zitafanyika kesho asubuhi kabla ya mechi hiyo ikiwemo kutembelea katika hospitali ya Bugando pamoja na viongozi watakaokuwa nao katika shughuli hiyo.



Yanga itashuka katika dimba la CCM kirumba jijini Mwanza Kesho Novemba 29 dhidi ya Alliance ambao wametoka kupigwa mabao 5-0 na Azam FC katika uwanja wao wa Nyumbani.

ZIKIWA zimepita siku chache tangu Shirikisho la Soka Afrika (CAF), kumtangaza mshambuliaji wa Simba, Meddie Kagere kuwa miongoni mwa wachezaji wanaowania Tuzo ya Mchezaji Bora wa Afrika kwa wale wanaocheza ligi ya ndani, sasa mchezaji huyo si wa mchezomchezo baada ya wakala wake kusema anayemhitaji sasa atoe bilioni 1.5.



Kagere amepata nafasi hiyo kutokana na kiwango cha juu alichoonyesha msimu uliopita akiwa na kikosi cha Simba katika michuano ya Ligi ya Mabingwa Afrika baada ya kuiongoza timu hiyo kufika hatua ya robo fainali ya michuano hiyo lakini pia yeye mwenyewe akishika nafasi ya pili kwa kuzifumania nyavu baada ya kufunga mabao sita.


Wakala wa Kagere, Patrick Gakumba ameliambia Championi Jumatano kuwa kutokana na hali hiyo thamani ya Kagere sasa imeongezeka mara mbili zaidi ya ile aliyokuwa nayo hapo awali. Alisema hapo awali thamani ya

Kagere ilikuwa ni kuanzia dola 300,000 (zaidi ya Sh milioni 685) lakini kwa sasa timu yoyote ambayo itamhitaji itabidi itoe dola 500,000 (zaidi Sh bilioni 1.143).



“Kusema kweli baada ya kusikia kuwa Kagere amechaguliwa kuwania Tuzo ya Mchezaji Bora Afrika, nilifurahi sana kwani sasa thamani yake imeongezeka ukilinganisha na ilivyokuwa hapo awali, hakika namshukuru sana Mungu.



“Kwa sasa tunaendelea kumuomba Mungu ili aweze kutusaidia Kagere aweze kuibuka mchezaji bora kwa sababu vigezo anavyo, aliibuka mfungaji bora namba mbili katika michuano hiyo ya Ligi ya Mabingwa Afrika. “Ikitokea akaikosa nafasi hiyo basi hata hapa alipofikia ni sehemu nzuri kwani tayari thamani yake imeongezeka siyo tena wa dola 300,000 sasa ni dola 500,000  na kuendelea.”

WIKI iliyopita kwenye Championi Jumatatu tuliishia kuona maisha ya Dida ambaye ni mlinda mlango wa zamani wa Simba akizungumzia kuhusu maisha yake ya shamba na kugusia kidogo kuhusu mipango yake ya soka. Huyu hapa leo anaendelea kuzungumza juu ya maisha yake na soka endelea; “Nime kuwa nikieleza mara kwa mara kwamba suala la mimi kujishughulisha na masuala ya ukulima siyo jambo la kushtua kwani ni kitu ambacho nakimudu na ninakipenda.



JEMBE GANI UNATUMIA? “Kuanza kulima natumia trekta ambalo hilo linafanya kazi yake ila maandalizi ya shamba ninatumia jembe la mkono.



Wakati wa kupalilia natumia pia jembe la mkono kwani katika muda huo haiwezekani ukatumia trekta.



MAZAO YAKO NI KWA AJILI YA NINI? “Mazao yote ni kwa ajili ya vitu vyote viwili yaani kwa chakula na biashara. Nafanya hivyo kwa sababu nina machaguo yote mawili kwa wakati mmoja.


UNAKUTANA NA UGUMU GANI KATIKA KULIMA?

“Kuna mengi ambayo yapo kwenye kilimo ila kikubwa ni pembejeo pamoja na namna ya usimamizi. Kuna wakati nakuwa sipo shamba nipo mjini wale wasimamizi ndiyo ambao wanashughulikia sasa hawawezi kwenda kwa spidi ambayo unahitaji jambo ambalo linaleta ugumu. “Kikubwa cha kujua ni kwamba changamoto haziepukiki kila sehemu zipo muhimu kupambana nazo.

SHAMBA KUNA MKWANJA KULIKO SOKA? “Mkwanja upo kwani hakuna kitu ambacho hakina faida ila kuhusu kuifananisha na soka hilo siwezi kulizungumzia kwa sasa.



UKIACHA KILIMO UNADHANI UNAWEZA KUREJEA KWENYE UBORA WAKO? “Nina uhakika na kile ambacho nakifanya kwani kati ya vitu ambavyo huwa havipotei ni kipaji. Nikipata nafasi sehemu nina uhakika kabisa wa kufanya vizuri kwa sababu kipaji hakipotei.


KUNA TIMU YOYOTE UNA MAZUNGUMZO NAYO? “Hilo lipo kwani kuna timu ambazo zimekuwa zikiwasiliana nami na wengi wamekuwa wakionyesha kwamba wanahitaji huduma yangu, wakati ukifika nitajua najiunga na timu gani.



ULIKUWA UNAHUSISHWA KUREJEA AFRIKA KUSINI, MPANGO HUO UPOJE? “Kweli ilikuwa hivyo na kuna timu nyingi ambazo zimekuwa zikinihitaji ila kama ambavyo awali nimesema kwamba ni suala la muda. Ninajua changamoto za soka la Afrika na ukizingatia kwamba nimecheza huko na kwa sasa naendelea na mambo

mengine.



NAMNA GANI UNAWASILIANA NA HAO WATU? “Dunia imeendelea na mambo yamebadilika sana kwa sasa, kuna mitandao ambayo inatufanya tuwe kwenye kijiji kimoja na wote tunafanya yale ambayo yanafanana hivyo sina mashaka katika hilo, ninafanya kwa wakati na hao ninawasiliana nao kwenye mitandao.



KIPI AMBACHO KINAKUPA UWEZO WA KUJIAMINI? “Uwezo binafsi na kujituma katika kazi ninayofanya, ndiyo yananifanya nakuwa kwenye ubora wangu muda wote.



UMECHEZA SIMBA NA YANGA KWA NYAKATI TOFAUTI KIPI UMEJIFUNZA?

“Zote ni timu kubwa na zina heshima yake hasa kutokana na kile ambacho wanakifanya, mashabiki wao ni wengi na zinajulikana duniani kucheza ndani ya hizi timu ni heshima na historia kwa kila mmoja anayetumikia ndani ya timu hizi. “Nimejifunza mengi namna ya kuishi na watu tofauti kwa nyakati tofauti na bado tumekuwa na furaha kwa wachezaji na viongozi pia.



LIGI YA BONGO UNAIONAJE? “Inazidi kuwa bora na ushindani ni mkubwa kwani kila timu inapambana kufikia malengo yake jambo ambalo linafanya kila timu ionyeshe ukomavu wake ndani ya ligi.



NAFASI YAKO KWENYE TIMU YA TAIFA? “Bado ni Mtanzania na ninaipenda nchi yangu wakati huu nimepewa nafasi kwenye kikosi cha timu ya taifa ya Beach Soccer ni sehemu ya kuanzia na ukifika wakati nitaonyesha mengi makubwa.



NENO KWA WACHEZAJI WENGINE “Mpira huwezi kucheza muda wote hivyo ni muhimu kuwekeza kwenye masuala mengine ambayo yatafanya maisha kuendelea. Kwa wale ambao wapo kwenye kilimo wanapaswa watambue kuwa nacho ni kipaji,” anamaliza Dida

Kocha wa Timu ya Taifa ya Tanzania Etienne Ndayiragije amesema moja ya sababu ya kuacha kwa Mlinda mlango wa soka wa Simba Aish Manula ni kuwa mchezaji huyo kucheza michezo katika timu yake ya Simba na timu ya Taifa kwa msimu uliopita na kupelekea kushindwa kufanya vizuri
kwenye timu ya Taifa.

Kocha Ndayiragije ametoa kauli hiyo wakati akizungumza kwenye kipindi cha Kipenga cha East Africa Radio kinachoruka kila siku kuanzia saa 2 usiku, ambapo amesema kuwa kwa msimu uliopita Simba ilifika mbali sana Kimataifa kwenye Klabu Bingwa Afrika, lakini pia timu ya Taifa ilienda mpaka michuanio ya AFCON.

"Mechi alizocheza Aishi Manula mwaka jana zilimzidi kwa sababu @SimbaSCTanzania ilifika mbali Kimataifa, pia timu ya Taifa ilienda mpaka AFCON, kwa hiyo tuliangalia utaratibu wa kumpumzisha, kwa hiyo hawezi kushuka kiwango' amesema Kocha Ndayiragije

Aidha Ndayiragije amesema kuwa "kuhusu Manula na Kaseja kwenye uwezo wao kuitwa timu ya Taifa, mara nyingi huwa tunaita wachezaji kulingana kiwango chake kwa wakati huo, lakini pia tunaangalia kama atakuwa na kiwango hichohicho tulichokiona ndani ya Klabu"

Aidha Kocha huyo amesema ameomba muda wa kutosha kwa ajili ya kukiandaa kikosi chake kwa ajili ya michuano ya Kimataifa ikiwemo ya CHAN

KAMATI ya Utendaji ya Yanga chini ya Mwenyekiti wake, Dk. Mshindo Msolla imeunda kamati mpya ya Mashindano yenye wajumbe 13 chini ya Mwenyekiti, Rodgers Gumbo na bosi wa Kampuni ya GSM Injinia Hersi Said.

Hiyo yote katika kuelekea mchezo mkubwa wa watani wa jadi kati ya Simba na Yanga utakaopigwa Januari 4, mwakani kwenye Uwanja wa Taifa jijini Dar es Salaam.

Timu hiyo imetangaza kamati hiyo mpya ikiwa ni siku chache tangu ivunjwe pamoja na Benchi la Ufundi la timu hiyo lililokuwa chini ya kocha wake Mkongomani, Mwinyi Zahera aliyesitishiwa mkataba kabla ya Charles Boniface Mkwasa kukaimu nafasi yake.

Kwa mujibu wa taarifa ambazo imezipata Championi Jumatano, wajumbe hao tayari wameanza kazi hiyo ya kuiongoza timu hiyo wakijiandaa na mchezo wa ligi dhidi ya Alliance United utakaopigwa keshokutwa Ijumaa kwenye Uwanja wa CCM Kirumba, Mwanza.

Kwa mujibu wa taarifa rasmi ya klabu, wajumbe hao 13 wanaounda kamati hiyo mpya kuwa Injinia Hersi Said, Beda Tindwa, Thobias Lingalangala, Edward Urio, Max Komba, Salum Mkemi, Yossuphed Mhandeni, Yanga Makaga, Adonis Bitegeko.

Wengine ni Injinia Heriel Mhulo, Injinia Isaack Usaka, Injinia Deo Muta na Hassan Hussein ambao wao kazi yao pekee ni kuweka mikakati ya timu kupata matokeo mazuri katika michezo ya ligi na mashindano mengine.

Mmoja wa viongozi wa Yanga aliongeza kuwa kamati hiyo itashirikiana kufanya kazi pamoja na Kamati ya Ufundi inayoongozwa na mwenyekiti wake, Salum Rupia ambaye aliwahi kuwa mwenyekiti wa usajili msimu wa 2010/ 2011.

“Ilikuwa ni lazima tuifanyie marekebisho kamati yetu ya mashindano kwa kuhakikisha wanakuwepo watu wenye uwezo wa kuisimamia timu ili kuhakikisha wanafanikisha ushindi kwenye kila mchezo wetu wa ligi na mashindano mengine.

“Tunashukuru tayari viongozi wa kamati hiyo wamepatikana na tunachosubiria ni kuona timu ikipata matokeo mazuri ya michezo yetu ya ligi na mashindano mengine.

“Kikubwa tulikuwa tukitaka kuona timu inapata matokeo mazuri na hayo yanapatikana pale morali ya timu inapokuwa kubwa inasaidia wachezaji kupambana uwanjani na kufanikiwa kupata ushindi,”alisema mtoa taarifa huyo.

Mkuu wa Kitengo cha Habari na Mawasiliano wa Yanga, Hassani Bumbuli amesema : “Ni kweli tayari imeteuliwa kamati iliyoanza kazi yake mara baada ya kupewa majukumu hayo na kikubwa tunataka kuona mafanikio zaidi siku za mbeleni.

Ukimuona mshambuliaji wa Simba Miraji Athuman ‘Sheva’ kwa sasa unaweza usimfahamu kirahisi kutokana na kubadilisha muonekano wa kichwa chake.

Sheva toka kuanza kwa msimu huu alikuwa anaonekana na nywele zilizosokotwa juu, lakini kwenye mazoezi ya Simba yaliyofanyika jana kwenye Uwanja wa Gymkhana, ameonekana na staili mpya ya nywele.

Inaelezwa kuwa, Sheva ameamua kunyoa nywele hizo, kutokana na ushauri aliopewa na baadhi ya viongozi wa klabu hiyo, wakidai kuwa mtindo wa awali ni wakihuni na hauendani na umri wake.

Championi Jumatano, lilipata nafasi ya kuzungumza na Sheva, ambaye alisema kuwa: “Nimeamua kunyoa hivi ili niwe na muonekano tofauti, hakuna jambo lingine.”